«كان مفروض يقدرني».. كهربا يفتح النار على كولر ويكشف كواليس نارية

شن محمود كهربا، مهاجم الفريق الأول لكرة القدم بالنادي الأهلي، هجومًا على مدربه السويسري مارسيل كولر، بسبب طريقة تعامله معه خلال الفترة الأخيرة.

وقال في تصريحات خلال برنامج «الكورة مع فايق» على «إم بي سي مصر»: «كلام كولر معايا مكنش مقنع، يعني كان بيقولي إتمرن كتير عشان تلعب على موديست، وأنا وقتها كنت أفضل بدنيا وفنيا، لذلك كلامه ما أقنعنيش».

وأضاف: «في ظل تواجد وسام أبوعلي كان متألق طبعا وبيكسب الفريق، لكن كان ممكن المدرب يديني فرصة ويلعبني ربع ساعة، خاصة إني بحب الخير لزمايلي وكان مفروض يقدرني نفسيا أكتر، ويعاملني بطريقة أفضل زي مكان بيعمل قبل وسام أبوعلي وموديست».

وعن تصريح كولر إن كهربا في الترتيب رقم 3 بين مهاجمي الأهلي، علق: «كان صعب مفيش حد بيقول كده، لو عايز تقول حاجة زي كده قولي أنا، زي ما قولتلي قبل فرح شقيقتي إني رقم 3».

وأتم: «أبويا وأمي وأختي وأخويا مستعد أعمل حاجة عشانهم، ودا فرح أختي الوحيدة مستحيل أغيب عنه، وروحت كلمت كولر استأذنته وقولتله في اتنين مهاجمين غيري والفريق لن يتأثر، قالي هفكر في الموضوع لكن قالي هترجع تبقى رقم 3».